அம்மனுக்கு சிரசு பொருத்தி கண் திறப்பு நிகழ்வு !
வேலூர் மாவட்டம், கே. வி. குப்பம் அடுத்த பி.கே.புரத்தில் வெகு விமரிசையாக நடந்தது கெங்கை அம்மன் சிரசு திருவிழா. வேலூர் மாவட்டம், கே. வி. குப்பம் அடுத்த பி.கே. புரம் கிராமத்தில் கெங்கை அம்மன் சிரசு திருவிழா வெகு விமரிசையாக நடந்தது. விழாவை முன்னிட்டு பிள்ளையார் கோயிலில் அம்மன் சிரசுக்கு பூஜை வழிபாடு செய்யப்பட்டது. இதனை தொடர்ந்து கெங்கை அம்மன் சிரசு முக்கிய வீதிகள் வழியாக வந்தது. அப்பொழுது பக்தர்கள் தங்கள் நேர்த்திக்கடன் நிறைவேறியதை யடுத்து கற்பூர தீபம் ஏற்றியும், தேங்காய் உடைத்தும் நேர்த்திக் கடனை செலுத்தினர். கோயிலில் சண்டாளச்சி உடல் மீது அம்மன் சிரசு பொருத்தப்பட்டு கண் திறப்பு நிகழ்வு நடந்தது.
இதில் ஊர் மக்கள் அம்மனுக்கு சீர்வரிசைகள் வைத்து பொங்கலிட்டு கூழ்வார்த்து அம்மனுக்கு படையலிட்டனர். மேலும் பக்தர்கள் வேண்டுதல் நிறைவேற விரதம் இருந்து கோலாட்டம், சிலம்பாட்டம் நடத்தினர். கிராமத்தில் இளைஞர்கள் மேளதாளம் வழங்க தண்டு மாலையை ஊர்வலமாக எடுத்து வந்து அம்மனுக்கு சாத்தினர். இதில் உள்ளூர் மற்றும் வெளியூரைச் சேர்ந்த ஆயிரக்கணக்கான பக்தர்கள் கலந்து கொண்டு கெங்கைஅம்மனை வழிபட்டனர்.
