காங்கேயம் முன்னாள் ஆணையர் பெண்களிடம் சில்மிஷம் – சட்டம் கடமையை செய்யுமா?

திருப்பூர் மாவட்டம் காங்கேயம் நகராட்சியில் டெங்கு கொசு தடுப்பு பணி மற்றும் காய்ச்சல் கண்டறியும் முகாம்களில் ஒப்பந்தப் பணியாளராக கடந்த ஆண்டில் பணியாற்றி வந்த பெண் ஒருவரை, அப்போது நகராட்சி ஆணையாளராக இருந்த முத்துக்குமார் தனது வீட்டு வேலைகளை செய்ய அழைத்ததாக கூறப்படுகிறது.

மேலதிகாரி என்ற அடிப்படையில் வீட்டு வேலை செய்யச் சென்றபோது தன்னிடம் தவறாக நடந்து கொள்ள முயற்சித்ததாகவும், இது தவறு என எச்சரித்த போது தன் ஜாதியை சொல்லி கொச்சைப் படுத்தியதாகவும்,
அவரிடமிருந்து விலகி வரும் போது இதை வெளியில் சொல்லக்கூடாது என மிரட்டியதாகவும்,தன் குடும்ப சூழ்நிலை காரணமாக இதுவரை பாதிக்கப்பட்ட அந்த புகார் அளிக்காததாகவும் கூறியிருந்தார்.

தொடர்ந்து என்னை போன்றே ஒப்பந்த பணியாளர்கள் சிலரிடமும் இது போல் நடந்து வருவதால் ஆணையர் மீது நடவடிக்கை எடுக்க வேண்டும் என வலியுறுத்தி நகராட்சி ஒப்பந்த பணியாளர்கள் 10 க்கும் மேற்பட்டோர் இந்த பாலியல் அத்துமீறல் சம்பவம் குறித்து மாவட்ட ஆட்சியர் அலுவலகத்தில் மனு அளித்திருந்தனர். மேலும் முதலமைச்சரின் தனிப்பிரிவுக்கும் மனு அளித்திருந்தனர்.

இது குறித்து எவ்வித வழக்கும் பதிவு செய்யப்படாத நிலையில் ஆணையர் முத்துக்குமார் பணியிட மாற்றம் பெற்று திருத்துறைப்பூண்டி நகராட்சி ஆணையராக தற்போது பணியாற்றி வருகிறார். இருப்பினும் இந்த பெண்களை அவரது இல்லத்தில் பணி செய்ய துப்புரவு பணியாளர் கார்த்திகேயன் என்பவர் வற்புறுத்தி உள்ளார்.

இதனையடுத்து திருப்பூர் முதன்மை நீதிமன்றத்தில் வழக்கு தொடுக்கப்பட்டது. அதனடிப்படையில் நீதிமன்றம் பிறப்பித்த உத்தரவின் பேரில் முன்னாள் ஆணையர் முத்துக்குமார் மற்றும் துப்புரவு பணியாளர் கார்த்திகேயன் ஆகிய இருவர் மீதும் கடந்த 3 ஆம் தேதி பெண் வன்கொடுமை,சாதிய வன்கொடுமை மற்றும் பணியிடத்தில் பாலியல் தொந்தரவு அளித்தல் உள்ளிட்ட பிரிவுகளின் கீழ் வழக்கு பதிவு செய்யப்பட்டது.