கோவை யுவன் சங்கர் ராஜா இசை நிகழ்ச்சியில் சுவர் இடிந்து விழுந்ததால் பரபரப்பு. போலீசார் விசாரணை.
கோவை சரவணம்பட்டியில் உள்ள தனியார் கல்லூரியில் நடைபெற்ற யுவன்சங்கர் ராஜா இசை நிகழ்ச்சியை காண வந்த இளைஞர்கள் சுற்றுச் சுவர் மீது ஏறிய போது இடிந்து விழுந்து விபத்து இதில் பாதுகாப்பிற்கு இருந்த பெண் காவலர்கள் மற்றும் இளைஞர் காயங்களுடன் மருத்துவமனையில் அனுமதிக்கப்பட்டுள்ளனர்.
கோவை சரவணம்பட்டி பகுதியில் உள்ள எஸ்.என்.எஸ் கலை அறிவியல் கல்லூரியில், இசையமைப்பாளர் யுவன்சங்கர் கலந்து கொண்ட இசை நிகழ்ச்சி நடைபெற்றது. இந்த நிகழ்ச்சி நடக்கவுள்ளதாக யுவன்சங்கர் ராஜா இன்ஸ்டாகிராமில் வெளியிட்ட தகவல் மற்றும் முதல் வரும் ஆயிரம் பேருக்கு இலவச அனுமதி என்ற விளம்பரத்தை பார்த்து சுமார் 15 ஆயிரம் பேர் அங்கு கூடினர்.
இந்நிலையில் அதிகபடியாக வந்த கூட்டத்தால் அனைவரையும் உள்ளே அனுமதிக்க முடியாத நிலை ஏற்பட்டது. ஆனலும் நிகழ்ச்சியை காண வந்தவர்கள் அங்கிருந்த கல்லூரி சுற்றுச்சுவர் மீது ஏறியும் உள்ளே செல்ல முயன்றதாக தெரிகிறது.
ஒரு கட்டத்தில் ஏராளமானோர் சுற்றுச்சுவர் மீது ஏறிச் செல்ல முயன்றதால், சுவர் இடிந்து விழுந்தது
அப்போது அங்கு பாதுகாப்பு பணியில் இருந்த பெண் உதவி ஆய்வாளர் பிளோமினா உள்ளிட்ட காவலர்கள், மற்றும் இளைஞர்கள் காயமடைந்தனர். சுவர் இடிந்ததையும் கவனிக்காமல் பலர் விழுந்தவர்கள் மீதே ஏறிச் சென்றதால் மேலும் சிலர் காயமடைந்துள்ளனர்.
இதையடுத்து அங்கு பணியில் இருந்த போலீசார் காயமடைந்தவர்களை மீட்டு மருத்துவமனைக்கு அனுப்பி வைத்தனர். இதனால் அங்கு பரபரப்பு ஏற்பட்டது. முறையான பாதுகாப்பு ஏற்பாடுகள் செய்யப்பட்டதா? என்பது குறித்து சரவணம்பட்டி போலீசார் விசாரணை மேற்கொண்டு வருகின்றனர்.
