தஞ்சையில் அப்தமித்ரா – பேரிடர் கால நண்பன் திட்டத்தில்12 நாள் சிறப்பு பயிற்சி ரெட்கிராஸ் பேரிடர் மேலாண்மை பயிற்சி மையத்தில் நடைபெற்றது.
தமிழ்நாடு பேரிடர் அபாய குறைப்பு முகமை மற்றும் தஞ்சாவூர் மாவட்ட பேரிடர் மேலாண்மை ஆணையம் சார்பில் நடைபெற்ற அப்தமித்ரா – பேரிடர் கால நண்பன் திட்டத்தில் ஐந்தாவது கட்டமாக 34 தன்னார்வலர்களுக்கு 12 நாள் சிறப்பு பயிற்சி ரெட்கிராஸ் பேரிடர் மேலாண்மை பயிற்சி மையத்தில் 29.10.22 முதல் 09.11.22 வரை நடைபெற்றது.
பேரிடர் மேலாண்மையில் சிறந்த பயிற்றுநர்கள் கொண்டு பேரிடர் மேலாண்மை, பேரிடர் தயார்நிலை, நிலநடுக்கம், நிலச்சரிவு, வெள்ளம், சுனாமி, சூறாவளி, இடி மின்னல், வறட்சி, அனல் காற்று, குளிரலை, அடிப்படை தேடல் & மீட்பு, உடல் நலம், முதலுதவி, உயிர் காக்கும் மருத்துவ சேவை, பாம்பு கடி, தீ பாதுகாப்பு, ரசாயன, உயிரியல், கதிரியக்க மற்றும் அணுசக்தி அவசர நிலை பாதுகாப்பு குறித்து செயல்முறை விளக்கத்துடன் பயிற்சி வழங்கப்பட்டது.
இப்பயிற்சியில் பங்கேற்ற தன்னார்வலர்களுக்கு மாவட்ட ஆட்சியர் கையொப்பமிட்ட சான்றிதழ் மற்றும் அடையாள அட்டையினை பேரிடர் வட்டாட்சியர் திருமதி ராஜேஸ்வரி முன்னிலையில் 34 (TN) தேசிய மாணவர் படை, தஞ்சாவூர் பிரிவை சார்ந்த சுபேதார் திரு. குருநாதன் அவர்கள் வழங்கினார்கள்.மேலும் இப்பயிற்சியில் சிறந்த தன்னார்வலராக செல்வன். ஹரிகிருஷ்ணன், சிறந்த கையேடு பராமரித்த செல்வி. வேணி, சிறந்த நாள் தொகுப்பினை தயாரித்த செல்வன். கார்த்திக், செல்வி. இளமதி, சிறந்த அட்டவணை தயாரித்த ஆகாஷ், பிரவீனா, சுபலக்ஷ்மி, ஹரிஹரசுதன், கிரி, சந்தோஷ் குழுவினர் மற்றும் சிறந்த செயல்முறை விளக்கம் வழங்கிய முனீஸ்வரன், கற்பகமூர்த்தி, பவித்ரா, மதிவதனி, சுபலக்ஷ்மி, ஹரிகிருஷ்ணன் குழுவினரை பாராட்டி விருதுகள் வழங்கப்பட்டன.
முன்னதாக பயிற்சியில் பங்கேற்ற அனைத்து தன்னார்வலர்களும் பேரிடர் மீட்பு, முதலுதவி, கயிறு முடிதல், காயங்களுக்கு கட்டு கட்டுதல், பாதிக்கப்பட்டவர்களை சுமந்து செல்லுதல் உள்ளிட்ட பல்வேறு செய்முறை விளக்கம் செய்து காண்பித்தனர்.இந்நிகழ்வில் ரெட்கிராஸ் ஆலோசனைக்குழு சேர்மன் டாக்டர். வரதராஜன், நிதிக் குழு சேர்மன் திரு. ஜெயக்குமார், துணை கிளை குழு சேர்மன் திரு. ஷேக் நாசர் உறுப்பினர்கள் டாக்டர். ராஜ்மோகன், திரு. தஞ்சை ராமதாஸ் பயிற்றுநர் திரு. துரை மாணிக்கம் உள்ளிட்ட பலர் கலந்து கொண்டனர். இம் முகாமிற்கான ஏற்பாடுகளை ரெட்கிராஸ் பொருளாளர் பொறியாளர் முத்துக்குமார், பயோகேர் திரு. முத்துக்குமார், பேரிடர் கட்டுப்பாட்டு மையம் மற்றும் ரெட்கிராஸ் ஊழியர்கள் செய்திருந்தனர்.
அப்தமித்ரா ஆறாவது கட்ட பயிற்சி 16.11.22 அன்று துவங்குகிறது. இப் பயிற்சியில் பங்கேற்க விரும்பும் தஞ்சாவூர் மாவட்டத்தை சார்ந்த 18 வயது முதல் 40 வயது உட்பட்டவர்கள் 7825044897, 9442894184 என்ற எண்களை தொடர்பு கொண்டு பதிவு செய்து பங்கேற்கலாம்.
