தரங்கம்பாடியில் தூய தெரசா மகளிர் கலை மற்றும் அறிவியல் கல்லூரி சார்பில் போதைபொருள் மற்றும் பிளாஸ்டிக் விழிப்புணர்வு மாரத்தான் போட்டி 250 மாணவிகள் பங்கேற்பு.
போதைப்பொருள் ஒழிப்பு மற்றும் பிளாஸ்டிக் ஒழிப்பு விழிப்புணர்வை ஏற்படுத்தும் வகையில் தரங்கம்பாடியில் உள்ள தூய தெரசா மகளிர் கலை மற்றும் அறிவியல் கல்லூரி சார்பில் இன்று காலை பெண்களுக்கான போதை பொருள் மற்றும் பிளாஸ்டிக் ஒழிப்பு விழிப்புணர்வு மாரத்தான் போட்டி நடத்தப்பட்டது.
இந்த விழிப்புணர்வு மாரத்தான் போட்டியில் மயிலாடுதுறை மாவட்டத்தைச் சார்ந்த கல்லூரிகள் மற்றும் பள்ளிகளில் பயிலும் 250 மாணவிகள் பங்கேற்றனர். மாரத்தான் போட்டியை தூய தெரசா கல்லூரியின் செயலர் அருள்சகோதரி கருணா ஜோசப்பாத், முதல்வர் காமராஜ் ஆகியோர் கொடியசைத்து தொடங்கி வைத்தனர்.
சாத்தங்குடியில் தொடங்கிய போட்டியானது எருக்கட்டாஞ்சேரி, ஒழுகைமங்கலம், ஒழுகைமேட்டுப்பாளையம், பொறையார் ,ராஜூவ்புரம், தரங்கம்பாடி வழியாக பத்து கிலோமீட்டர் தூரம் கடந்து மீண்டும் துவங்கிய இடத்திலேயே முடிவடைந்தது.
மாரத்தான் போட்டியில் முதல் இடத்தை ஹாபியா குட் சமரிட் மெட்ரிகுலேஷன் பள்ளி மயிலாடுதுறை, இரண்டாம் இடம் சாஸ்வதி அரசு பெண்கள் மேல்நிலைப் பள்ளி மயிலாடுதுறை, மூன்றாம் இடம் தனுஷ்கா குட் சமரிட் மெட்ரிகுலேஷன் பள்ளி மயிலாடுதுறை சார்ந்த மாணவிகள் பெற்றனர்.
முதல் மூன்று இடங்களைப் பெற்ற மாணவிகளுக்கு முறையே ரூ 15 ஆயிரம், ரூ 10 ஆயிரம் ,ரூ 5 ஆயிரம் ரொக்கப்பணம் மற்றும் பதக்கம், சான்றிதழ் வழங்கப்பட்டன.தொடர்ந்து 4 முதல் 10 இடங்களை பெற்ற மாணவிகளுக்கு தலா ரூ1000 ஆறுதல் பரிசும் மாரத்தான் போட்டியில் பங்கேற்ற அனைத்து மாணவிகளுக்கும் சான்றிதழ்கள் வழங்கப்பட்டது.
மேலும் இந்நிகழ்ச்சியில் மயிலாடுதுறை பாராளுமன்ற உறுப்பினர் ராமலிங்கம் தரங்கம்பாடி பேரூராட்சி தலைவி சுகுண சங்கரி குமரவேல் ஆகியோர் கலந்து கொண்டனர் பரிசுகளை வழங்கினர். மாரத்தான் போட்டியை முன்னிட்டு வழி நெடுகிலும் பொறையார் போலீஸார் பாதுகாப்பு பணியில் ஈடுபட்டிருந்தனர்.
