ராஜபாளையம் அருகே இன்று காலை நடந்த விபத்தில் 7ம் வகுப்பு மாணவன் படுகாயம்; விபத்துகள் நடப்பதாக குற்றம் சாட்டி மாணவனின் உறவினர்கள்.

விருதுநகர் மாவட்டம் ராஜபாளையம் அருகே உள்ள சேத்தூரை சேர்ந்த ஜெகதீஸ்வரன் என்பவரது மகன் மார்டின். 7ம் வகுப்பு படித்து வரும் இவர், இன்று காலை வீட்டின் அருகே அரசரடி பேருந்து நிறுத்தம் எதிரே உள்ள பெட்டி கடையில் நின்று கொண்டிருந்தார்.

 

அப்போது கேரள மாநிலம் கண்ணூர் மாவட்டத்தில் உள்ள விலக்கனூரில் இருந்து சென்னைக்கு சென்று கொண்டிருந்த சிஜோ என்பவர் ஓட்டி வந்த கார் சாலையோரம் மோதி விபத்துக்குள்ளானது.

 

இதில் பெட்டி கடையில் நின்று கொண்டிருந்த மார்டின் தூக்கி வீசப்பட்டார். மேலும் அருகே இருந்த மிதிவண்டிகள், இரு சக்கர வாகனங்கள் சேதமானது. தலையில் அடிபட்டு கிடந்த மார்டினை, விபத்தை ஏற்படுத்திய வாகனத்திலேயே பெற்றோர்கள் அரசு மருத்துவமனைக்கு அழைத்து சென்றனர்.

அங்கு தீவிர சிகிச்சை பிரிவில் அனுமதிக்கப்பட்ட மார்டின், முதலுதவிக்கு பிறகு பாளையங் கோட்டை அரசு மருத்துவமனைக்கு அனுப்பி வைக்கப்பட்டார்.

இந்த நிலையில் போக்குவரத்து நெரிசல் மிகுந்த இடத்தில் வேகத்தடை இல்லாததால் அடிக்கடி விபத்துகள் ஏற்படுவதுடன், உயிரிழப்பும் ஏற்படுவதால் உடனடியாக வேகத்தடை அமைக்க கோரி மார்டினின் உறவினர்கள் நூற்றுக்கும் மேற்பட்டோர் திடீர் சாலை மறியலில் ஈடுபட்டனர்.

இதனால் தென்காசி – மதுரை தேசிய நெடுஞ்சாலையில் போக்குவரத்து கடுமையாக பாதிக்கப்பட்டது. சாலையின் இரு புறமும் சுமார் 2 கிமீ தூரத்திற்கு 200க்கும் மேற்பட்ட வாகனங்கள் அணி வகுத்து நின்றதால் அப் பகுதியில் பெரும் பரபரப்பு காணப்பட்டது.

 

போராட்டத்தில் ஈடுபட்ட பொது மக்களிடம் பேச்சு வார்த்தை நடத்திய காவல் துறையினர் அவர்களை அலட்சியம் செய்து பேசியதாக கூறப்படுகிறது. இதனால் போலீசாருக்கும், பொது மக்களுக்கும் இடையே சிறிது நேரம் வாக்குவாதம் ஏற்பட்டது.

பின்னர் தகவல் அறிந்து வந்த டிஎஸ்பி ப்ரீத்தி மற்றும் சேத்தூர் காவல் துறையினர் பொது மக்களிடம் சமரசம் பேசினர். ஒரு வாரத்தில் வேகத்தடை அமைக்க நடவடிக்கை எடுக்கப்படும் என்ற காவல் துறை அதிகாரிகளின் உறுதியை ஏற்றுக் கொண்ட பொது மக்கள் ஒரு மணி நேரத்திற்கு பிறகு போராட்டத்தை கை விட்டு கலைந்து சென்றனர்.

ம.வெள்ளானைப்பாண்டியன் ராஜபாளையம்.